CMATI

Vostede está en:
|
|
|
Compartir

Medio Ambiente licitará este outono o proxecto das obras de saneamento e abastecemento das parroquias de Urdilde e Sorribas no concello de Rois

A conselleira de Medio Ambiente e Ordenación do Territorio e o alcalde de Rois asinaron esta mañá o convenio de colaboración que permitirá a renovación das instalacións hidráulicas en ambas parroquias

As actuacións previstas mellorarán este servizo básico á poboación, á vez que garanten a recuperación dos ecosistemas fluviais da zona e a mellora ambiental das augas dos ríos en dito termo municipal
 

Santiago de Compostela, 13 de setembro de 2018.- A Consellería de Medio Ambiente e Ordenación do Territorio licitará este outono a redacción do proxecto para mellorar o sistema de saneamento e abastecemento das parroquias de Urdilde e Sorribas, no Concello de Rois.

Esta licitación é posible grazas á sinatura do convenio entre a Consellería de Medio Ambiente e Ordenación do Territorio e o Concello de Rois, celebrada esta mañá entre a responsable do departamento de Medio Ambiente, Beatriz Mato, e o rexedor municipal, Ramón Tojo.

O importe do convenio establece un orzamento máximo de 500.000 euros e as actuacións permitirán dar unha solución á situación actual do saneamento nestes puntos do Concello de Rois, cuxas augas son tratadas por unhas estacións depuradoras que non prestan o servizo de forma axeitada. Por isto, proponse en cada unha destas zonas a instalación dunha nova depuradora que atenda á demanda actual e futura.

No caso da parroquia de Sorribas, proponse executar unha nova depuradora compacta para tratar as augas residuais dos núcleos, conectando á Edar existente, que non presenta un funcionamento óptimo. Mentres, na parroquia de Urdilde as obras consisten fundamentalmente na demolición e retirada da depuradora existente, así como a instalación dunha nova depuradora de maior capacidade.

Grazas a esta acción, ofrécese aos veciños un acceso aos servizos básicos de abastecemento e depuración e unha mellora da calidade de vida; ao tempo que se recuperan zonas degradadas polas achegas nos distintos ecosistemas fluviais e se acada unha mellora ambiental da calidade das augas dos ríos.

Esta nova actuación é unha aposta máis do Goberno galego pola mellora das augas e a conservación do medio ambiente neste municipio, no que xa se teñen dado mostras de cooperación da Xunta -a través de Augas de Galicia- e o Concello de Rois. Esta colaboración entre administracións permitiu levar a cabo outros investimentos en materia de infraestruturas hidráulicas, como a ampliación do abastecemento e saneamento en Macedos, cun importe de case 230.000 euros.
 

Departamentos relacionados

  • Gabinete de comunicación

  • Correo-e: prensa.mot@xunta.es